Экологтар құс фабрикасын жапса, жұмыртқа бағасы қымбаттайды

Павлодарда экологиялық дабыл қағылды. Ондағы құс фабрикасы топырақ пен жер асты суын ластап жатыр.

Бұл туралы Orda.kz Астана телеарнасына сілтеме жасап хабарлады.

Экологтардың айтуынша, кәсіпорын қалдықтары жерге көміліп, табиғатқа зиян келтіреді.

Облыстық экология департаменті «Павлодар» құс фабрикасын сотқа беріп, кәсіпорынның жұмысын уақытша тоқтатуды сұрап отыр.

Тексеріс тұрғындардың шағымынан кейін жүргізілген. Жергілікті халық Жетекші ауылындағы адам төзгізсіз иіске тұншыққан.

– Топырақты зертханалық зерттеулер нәтижелері бойынша калий, фосфор, магний, кальциде күкірттің көрсеткіштері 2 есеге артық екені анықталды. Яғни, ол топыраққа әсері етеді. Осы арқылы ол жер асты суына жетеді. Бұл заңбұзушылық, - деді Павлодар облысы бойынша Экология департаментінің инспекторы Александр Степаненко.

Мамандар уақытша болсын кәсіпорынның жұмысын тоқтату керек дейді, алайда бұл шешімге кәсіпкер қарсы. Ол жұмыс тоқтаса, қарызға батамын деп отыр.

– Мен тұрғындардың қарсылығына байланысты құс фабрикасын ауылдан 2 шақырымға дейін көшіруге дайынмын. Оған қоса иіс шығармайтын қорғаныс құралдарын күшейтеміз. Қажетті барлық шараны орындауға дайынбыз. Тек бизнесті тоқтата алмаймыз, - деді «Павлодар құс» фабрикасының жетекшісі Ербол Досыбаев.

Бұл жанжалға кәсіпкерлер құқығын қорғау жөніндегі кеңес өкілдері де араласып жатыр. Олардың айтуынша, құс фабрикасының жұмысы тоқтаса, ол оның сатылымдағы бағасына әсер етеді. Себебі, кәсіпорын Павлодар нарығының 30 пайызын қамтып отыр.

Әзірге сот шешімі шықпаған.