«Эйр Астанадан» халық әртісі Бибігүл Төлегеновадан кешірім сұрау талап етілді

«Эйр Астана» әуе компаниясының президенті Питер Фостердің атына үндеу жолдап, олардан халық әртісі Бибігүл Төлегеноваға дөрекі қарым-қатынас жасағаны үшін кешірім сұрау талап етілді, деп хабарлайды Orda.kz Лека Савельеваның Facebook парақшасына сілтеме жасап.

«3 қыркүйекте сағат 10.30-да Астанадан Алматыға ұшатын «Эйр Астана» әуе компаниясының 852 рейсінде қоғамымыздың қайда бара жатқаны туралы ойлануға мәжбүрлейтін жантүршігерлік оқиға болды. Аты аңызға айналған әнші, КСРО халық әртісі және Қазақстанның халық әртісі Бибігүл Төлегенова әуе жолаушыларының ұшаққа отыру үшін шығар дәліз бойымен өтуін бақылаған «Эйр Астана» қызметкерінің дөрекілігі мен құрметсіздігіне тап болды» деп жазды Лека Савельева.

Әуе компаниясы қызметкерлеріне Бибігүл Ахметқызының омыртқасында ауыр ақау бар екені айтылды. Арбаға таңылған әртісті қызы алып келе жатқанда, оларды кенеттен Эйр Астананың қызметкері тоқтатып, арбадағы жолаушылар бірінші болып отырғызылуы керек немесе соңғы жолаушы өткенше күту керек деп қатты айтты.

Содан кейін халық әртісі оның Астананың Құрметті азаматы екенін және аз да болса ережеден ауытқуға тура келетінін айтқан.

Ол «Эйр Астанадан» кешірім сұрауды және үлкендерге құрмет көрсетуді үйренуді талап етті. Әуе компаниясының баспасөз қызметі бұған жауап қайтарып, халық әртісіне деген құрметін білдірді, бірақ кешірім сұрамады.

«Халықаралық авиациялық қауіпсіздік ережелеріне сәйкес, қозғалу мүмкіндігі шектеулі жолаушылар отырғызудың басында немесе соңында бортқа шақырылады. Бұл ереже барлық жолаушыларды отырғызу үшін қолайлы жағдай жасауға мүмкіндік береді, сонымен қатар терминалдан эвакуациялау ережелерімен анықталады. Бізге жеткен мәлімет бойынша, ҚР халық әртісі Бибігүл Төлегенова ханым және оны ертіп келген қызы отырғызу басталғаннан кейін келген, сондықтан авиакомпанияның агенті отырғызу аяқталғанша күтуді сұраған. Әуе компаниясы түсініспеушілікке өкініш білдіреді және қызмет көрсету сапасын жақсарту мақсатында бұл іске қосымша тексеру жүргізеді» деп хабарлады компания.