«Эйр Астана» әуе кемелерін ауыстырған кезде жолаушыларды алдын ала хабардар етуге міндеттенді

Көлік вице-министрі Талғат Ластаев авиакомпания өкілдерімен жұмыс кеңесін өткізді.

Көлік вице-министрі Талғат Ластаев «Эйр Астана» әуе компаниясының өкілдерімен жұмыс кеңесін өткізді, деп хабарлады мекеменің баспасөз қызметі.

Кездесуге «Эйр Астана» әуе компаниясының ұшақтарын жолаушыларға алдын ала тиісті хабарламасыз, қызмет құны тең емес FlyArystan ұшағына ауыстыру жағдайларының көбеюі себеп болды.

Отырыс қорытындысы бойынша ҚР Көлік вице-министрі Талғат Ластаев мынадай тапсырма берді:

• - «Эйр Астана» әуе кемелерін FlyArystan әуе кемелеріне ауыстыру тәжірибесін барынша азайту бойынша шаралар қабылдау;
• әуе кемелерін ауыстыру кезінде жолаушыларды алдын ала хабардар ету жұмысын қамтамасыз ету және ұйымдастыру;
• 
  борт ауыстырылған жағдайда жолаушыларға өтемақы төлеу тәртібі бойынша ұсыныстар әзірлеу; 
•  «Эйр Астана» резервтік ұшақтарының санын бірден екіге дейін ұлғайту шараларын қабылдау. 

Көлік министрлігі рейс мәртебесі өзгерген кезде жолаушылар құқықтарының сақталуын бақылауды жалғастырады және бұзушылықтар анықталған жағдайда әкімшілік шаралар қабылдайтын болады.