Ұйғыр ауданының жастары аудан атына қатысты президентке хат жолдады

Алматы облысы Ұйғыр ауданының жастары екі мың адамның қолы қойылған ашық хатты ел президенті мен жауапты органдарға жолдады. Хаттағы шешімін таппаған мәселе Ұйғыр ауданының атауы ретінде көрсетілген. Мәтінді жазушы, журналист Қанат Әбілқайыр өз facebook парақшасында жариялады.

Ашық хатта көрсетілген тұлғалар: тұңғыш президент, қауіпсіздік кеңесінің төрағасы Н.Ә.Назарбаев, қазіргі президент Қ.К.Тоқаев, ұлттық қауіпсіздік комитетінің төрағасы К.Қ.Мәсімов, президент әкімшілігі басшысының бірінші орынбасары Д.Ә.Абаев, Алматы облысының әкімі Қ.А.Бозымбаев.

«Тәуелсіздік таңының атқанына 30 жыл болды. Осы уақыт ішінде өстік, өркендедік, дамыдық. Барлық сала алға басты. Бірақ әлі күнге шешімін таппаған күрделі мәселелелер аз емес. Сондай күрделі дүниелердің бірі – Алматы облысына қарасты Ұйғыр ауданының атын ауыстыру» деп басталған хат мәтінде Алматы облысының экс-әкімі уәдесін орындамағаны жазылған.

Сонымен қатар, хатқа қол қойғандардың арасында өзге ұлт өкілдері де бар екені айтылған.

«Сондықтан біз осы хатқа қол қойған аудан жастары (Барлығы екі мыңнан аса азамат пен азаматшалар. Қол жинау жалғасуда) ауданымыздың тарихи атауы «Қарадаланы» еншілеп берулеріңізді сұраймыз. Осы хатқа қол қоюшылар арасында тіпті өзге ұлттың, нақтырақ айтсақ, ұйғыр, орыстардың да бар екенін аңғару қиын емес» делінген жазбада.

Ел президенті мен баспасөз хатшылары белгіленген жазбада аудан атауын «Қарадала» деп ауыстыру ұсынылған. Толық мәтін төменде: