Израильдің әуе шабуылдарынан қаза болған құрбандар саны 550-ден асты

Израильдің Ливан территориясына жасаған соңғы әуе шабуылдарынан кем дегенде 569 адам қаза болды, деп хабарлайды Orda.kz.

BBC ақпараттарына сүйенсек, қаза болғандардың ішінде 50 бала мен 94 әйел бар. Бұл шабуылдар дүйсенбіден бері жалғасып, 1800-ден астам адам жарақат алды.
Ең көп зардап шеккен аймақтардың бірі — Бейруттың оңтүстігінен 20 шақырым жерде орналасқан Джия-Саадият. Жергілікті билік инфрақұрылымның елеулі зақымдалғанын және гуманитарлық дағдарыстың болып жатқанын хабарлады. Дәрігерлер мен құтқару қызметтері шабуылдардан соң көмек көрсете алмай қиналып жатыр.

Израиль қорғаныс әскерінің өкілі Даниэль Хагари сейсенбіде Израиль әскери-әуе күштері Бейрутты нысанаға алып, «Хезболла» зымыран күштерінің қолбасшысы Ибрахим Кубаисиді ғана емес, кем дегенде тағы екі командирді өлтірді деп мәлімдеді. Хагаридің айтуынша, Кубаиси соңғы күндері Израильге шабуылдауға, соның ішінде сейсенбіде 300 реактивті снарядты ұшыруға жауапты болған.

Сейсенбі күні таңертең Хезболла Израильге ондаған зымыран ұшырды. Олардың көбі тоқтатылды. Бірақ соның өзінде кейбірі ғимараттарды қиратты.