«Израиль мен Палестина»: 39 мың адам қаза болған соғысқа АҚШ араласа ма?

Израиль тағы да Газа секторына әуеден соққы жасады. Соның ішінде оңтүстіктегі Хан-Юнис, орталықтағы Бурейдж босқындар лагері және солтүстіктегі Газа қаласына соққы жасалды.

Бұл туралы халықаралық Aljazeera ақпараттық агенттігі хабарлады.

Әуе соққылары кезінде израиль әскері Хан-Юнисте жараланғандарды алып келе жатқан жедел жәрдем көлігіне де оқ жаудырды. Қазіргі таңда Израиль түрмелерінен он бір палестиналық босатылды. 

Израиль әскері шабуыл жасап жатқанда, Израиль премьер-министрі Биньямин Нетаньяху Вашингтонда АҚШ президенті Джо Байденмен және вице-президент Камала Харристің кездесулерінде болды. АҚШ вице-президенті  Камала Харрис палестиналықтардың жағдайына назар аударып, Газа секторындағы қайғы-қасіреті жайлы «үндемей» қалмайтынын айтты.

Соңғы мәліметтер бойынша, Газадағы қақтығыс барысында 39 175 адам қаза тауып, 90 403 адам жарақат алды. Израильде ХАМАС-тың 7 қазандағы шабуылдары нәтижесінде 1 139 адам қаза тауып, ондаған адам Газада тұтқында қалып отыр.

Еске сала кетейік, Orda.kz бұған дейін Газада қаза тапқан палестиналықтардың саны 38 мыңнан асып кеткенін жазған болатын.