Израиль Иранның ядролық және мұнай нысандарына соққы беруі мүмкін

2024 жылдың 2 қазанында Иран ресми түрде Израильге қарсы ракеталық шабуылды аяқтағанын жариялады, деп хабарлайды Orda.kz Al Jazeera сілтеме жасап.

Кеше болған шабуыл Израильге жасалған ең ірі әскери шабуыл болды. Ирандықтар Израильге 200 ракета ұшырып, олардың көбісі әуеден жіберілді. 

Осыған жауап ретінде Израиль мен АҚШ жақын күндері  соққы беруге уәде еткенін әлемдік БАҚ жарыса жазуда. Бұл соққылар Иранның мұнай және басқа стратегиялық нысандарына бағытталуы мүмкін, деп жазады американдық Axios жаңалықтар сайты израильдік шенеуніктерге сілтеме жасап.

Иран билігінің мәліметінше, ракеталық шабуыл тек 3 израильдік әскери базаға бағытталды. Иранның сыртқы істер министрі Аббас Аракчи егер «израиль режимі әрі қарай кек қайтаруды жалғастырмаса», олардың әрекеттері аяқталғанын мәлімдеді.

«Израиль шенеуніктерінің айтуынша, егер бұл жағдай орын алса, Иранның ядролық нысандарына соққы беру сияқты барлық нұсқалар қарастырылатын болады»,  деп хабарлайды Axios.

Израильдің премьер-министрі Биньямин Нетаньяху ирандық шабуылды «үлкен қате» деп, Иранның бұл үшін жауап беретінін айтты. Вашингтон өз кезегінде, Америка Иранға бұл істегендерінің салдарына қатты өкінетінін мәлімдеді.

Сонымен қатар, БҰҰ Қауіпсіздік Кеңесі  Таяу Шығыс шиеленісіне қатысты отырыс өткізуді жоспарлап отыр, ал Еуропалық Одақ соғысты дереу тоқтатуға шақырды.