Израиль Иранға әуе шабуылын жасады

Израиль армиясы сенбі, 26 қазанға қараған түні Ирандағы аты аталмаған әскери нысандарға жауап шабуылы жасалғанын хабарлады, деп хабарлайды Orda.kz DW басылымына сілтеме жасап.

«Иран режимінің Израиль мемлекетіне бірнеше ай бойы үздіксіз шабуылдарына жауап ретінде Қорғаныс күштері қазір Ирандағы әскери нысандарға нысаналы соққы беруде» делінген ЦАХАЛ мәлімдемесінде. 

Ирандық БАҚ Тегеран тұрғындары мен астана маңындағы аудандардың бірінде бірнеше жарылыс естігенін хабарлады. Иранның мемлекеттік телеарнасында бұл әуе қорғанысының жұмысы болуы мүмкін деген нұсқа болды.

NBC News хабарлауынша, нысаналар Тегерандағы казармалар мен қару-жарақ қоймасы болған. Ирандық дереккөздерге сілтеме жасаған Channel 12 арнасының хабарлауынша, соққы алған нысандар арасында Ислам революциясы Сақшылар корпусының (ИРСК) командалық пункті болған.

26 қазан күні таңертең Израиль армиясының өкілдері Ирандағы операцияның аяқталғанын хабарлады.

«Ұшақтарымыз аман-есен елге оралды. Жауап беру соққысы аяқталды, миссия орындалды» делінген Израиль армиясының мәлімдемесінде.