Израиль Газада ауқымды операциясын жалғастырып, тәулігіне 100-ден астам соққы жасады

Соңғы 24 сағатта Израиль армиясы Газадағы түрлі нысаналарға 100-ден астам шабуыл жасады, деп хабарлайды Orda.kz. 

Шамамен 60 адам қаза тапты. ЦАХАЛ мәлімдегендей, ХАМАС инфрақұрылымының нысандары - зымырандар, туннельдер және басқа да ғимараттар шабуылға ұшырады. Ал жергілікті дереккөздер тұрғын аудандарда едәуір қираулар болғанын хабарлады.

Қазір Израиль армиясы құрамында бар барлық жаяу әскерлер мен броньды танк бригадаларын Газа секторына орналастырды, деп жазады The Times of Israel. 

Сондай-ақ, операцияға резервшілер де тартылған. Әскерлер баяу жылжып отыр, себебі олар көптеген техниканы алып жүреді. Сондықтан жердегі қақтығысу іс жүзінде мүлдем  жоқ  десе де болады,  соққылардың бәрі әуеден жасалады.

Жалғасып жатқан ұрыс қимылдары аясында Израиль қоршауды ішінара әлсіретіп, 388 жүк көлігін гуманитарлық көмек ретінде әкелуге мүмкіндік ашты. Алайда палестиналық көмек топтары ақпаратты жалған деп,  БӨП арқылы тек 119 жүк көлігінің өткенін растады, бұл жергілікті халыққа көмек көрсету үшін жеткіліксіз.

17 мамырда Израиль Газаға қарсы кең ауқымды шабуыл бастады. «Гедеон арбалары» операциясы 2023 жылғы қазанда Израильдің шекаралық аудандарына Хамастың шабуылына жауап ретінде басталған әскери кампанияның соңғы кезеңі ретінде қарастырылды.

Биньямин Нетаньяхудың айтуынша, Палестина қозғалысына «теңдессіз шабуыл» жасаудың мақсаты - Газа секторын толық басып алу.

2024 жылғы сәуір айында тіпті АҚШ студенттері Газа секторындағы қақтығысты тоқтатуға шақырып, наразылыққа шыққан болатын.

Былтырғы мамыр айында палестиналық ХАМАС ұйымының жетекшісі Исмаил Хания Катар мен Мысырдан келген медиаторларға Газа секторында атысты тоқтату туралы  ұсынысын қабылдағанын мәлімдеген болатын, соған қарамастан шайқас әлі жалғасып жатыр.