Израиль 20 шілде күні кешке Йемен аумағына тікелей шабуыл жасады

Израильдің Йеменге соққысына қатысты БҰҰ Бас хатшысы бейбіт тұрғындар мен инфрақұрылымға зиян келтірмеуге шақырды, деп хабарлайды Orda.kz.       

БҰҰ Бас хатшысы Антониу Гутерриш Израильдің Йеменге жасаған соққысына үн қатып, қақтығысқа қатысушы тараптарды бейбіт тұрғындар мен инфрақұрылымға зиян келтірмеуге шақырды.

«Бас хатшы Йемендегі Ходейда порты мен оның төңірегіндегі аумақты нысанаға алған әуе шабуылы туралы хабарларға қатты алаңдаушылық білдірді. Израиль бұл шабуылдар үшін хуситтердің Израильге жасаған бұрынғы шабуылдарына жауап екенін атап өтті» делінген БҰҰ хатшысының өкілі жариялаған жазбада. 

Гутерриш сонымен қатар аймақтағы жағдайдың одан әрі шиеленісу қаупіне «терең алаңдаушылық» білдірді. Ол тағы да барлығын барынша ұстамдылыққа шақырды.

20 шілдеде Израиль қорғаныс күштері (ЦАХАЛ) Йемендік Хуситтердің Ансар Аллах қозғалысының әскери нысандарына шабуыл жасағанын хабарлады. Бұған дейін хусит өкілдері Израильдің Ходейда портындағы мұнай қоймаларына шабуыл жасағанын айтқан болатын.

«Біраз уақыт бұрын ЦАХАЛ жауынгерлері соңғы айларда Израильге қарсы жасалған жүздеген шабуылдарға жауап ретінде Йемендегі Ходейда порты маңындағы хусит лаңкестік режимінің әскери нысандарына соққы берді» деп мәлімддеді ЦАХАЛ өзінің Telegram арнасында.  

Хуситтер «бұл агрессияға» жауап беретініне уәде берді. Олар «жаудың өмірлік маңызды нысандарына» соққы беруді көздеп отыр. Сондай-ақ «Ансар Аллах» Газа секторын қолдау операцияларын тоқтатпауға уәде берді.