Италияда қазақстандық студенттің мәйіті табылды

Италияның оңтүстігіндегі Бриатико қаласында қазақстандық Нұрдәулет Машариповтің мәйіті жағалаудағы жартастардың арасынан табылды, деп хабарлайды Orda.kz.

Ол Орал қаласындағы Назарбаев зияткерлік мектебінің түлегі, Италиядағы жоғары оқу орнында білім алып жүрген.

Марқұмның досы Дінмұхамед Мұхтаров Threads-тегі парақшасында жас жігіттің жазатайым оқиға салдарынан теңізге батып кеткенін мәлімдеді. Қазіргі кезде оның отбасы денені Қазақстанға әкелу үшін қаражат жинап жатыр. Тасымалдау шығыны 8 мың еуроны құрайды.

Жергілікті БАҚ өкілдерінің ақпаратына сүйенсек, зорлықпен өлтіру белгілері анықталмаған. Алайда оның денесінде жартасқа соғылудан қалған жарақаттар бар. Алдын ала болжам бойынша, студент суға кеткен.

Сарапшылар оның мәйіт табылғанға дейін шамамен 15 сағат бұрын көз жұмғанын айтады. Жігіттің қалтасынан ұялы телефоны, ал жағалаудағы тастардың үстінен сөмкесі мен киімдері табылған.