Италия премьер-министрі әрі Илон Масктің досы Джорджия Мелони Астанаға не үшін келе жатыр?

21 сәуір 2025 12:34 Перизат Жарылқасын

Фото: Governo Italiano / Wikimedia Commons, CC BY 3.0 it

Италия Орталық Азиядағы дипломатиялық позициясын нығайтқысы келеді және Қытайға тәуелділікті азайтуды көздейді. Италияның премьер-министрі Джорджия Мелони 26-27 сәуір күндері Астанаға келіп қайтпақ, деп хабарлайды Orda.kz.

Италиялық бұқаралық ақпарат құралдары премьер-министр Джорджия Мелонидің Орталық Азияға алдағы сапарының қалай болатынын талқылап жатыр. Олар бұл сапардың стратегиялық маңыздылығына ерекше назар аударып отыр.

Жуырда Вашингтонға жасаған сапарынан кейін, Италия парламентінде қызу пікірталастар туғызған Мелони Самарқанд пен Астанаға келеді. Il Messaggero газеті бұл сапарды Италияның өңірдегі экономикалық және саяси ықпалын күшейтуге бағытталған маңызды дипломатиялық миссия деп сипаттайды.

Италия Орталық Азияны геосаяси шиеленіс күшейіп, Еуроодақ Ресей мен Қытайға тәуелділікті азайтуға тырысып жатқан қазіргі жағдайда аса маңызды өңір деп санайды. Италия ерекше назарды сирек жер металдарына аударып отыр. Жақында Қазақстанда қорғаныс өнеркәсібі, цифрлық технологиялар мен жасыл энергетиканың дамуы үшін өмірлік маңызы бар церий, лантан, неодим және иттрий сынды минералдарға бай ірі кен орны табылды. Рим бұл ресурстарға қол жеткізуді көздеп отыр.

Орталық Азия Еуроодақтан жалпы құны 12 миллиард еуро болатын ауқымды инвестициялық пакет алды. Бұл қаражат Транскаспий халықаралық көлік бағытын дамытуға бағытталған. Бұл бағыт Еуропа мен Азияны Кавказ және Каспий теңізі арқылы, Ресей аумағын айналып өтіп, байланыстырады. Мелони осы мүмкіндікті пайдаланып, Италияны Еуропа мен Орталық Азия арасындағы келіссөздерде негізгі делдалға айналдырмақ ниетте. Ресей, Қытай және АҚШ-тың бәсекелес болатынына қарамай, осы мақсатта жұмыс істемек.

Италиялық бұқаралық ақпарат құралдары оппозиция премьер-министр Мелонидің сыртқы саясатты АҚШ мүдделерімен тым тығыз байланыстырып отыр деп айыптайтынын атап өтті. Сондықтан үкімет басшысының Орталық Азияға сапарын Вашингтон мен Брюссель арасындағы қатынасты теңестіруге бағытталған қадам ретінде қарастыруға болады.

Джорджия Мелони 26-27 сәуір күндері Қасым-Жомарт Тоқаевтың шақыруымен Астанаға «Орталық Азия — Италия» атты алғашқы саммитке келеді. Шара барысында стратегиялық әріптестікті дамыту мәселелері талқыланады.

Жаңалықтар

барлық жаңалықтар