Италия мен Түркия жағалауында 40-тан аса мигрант қаза тапты

Ливия мен Ауғанстаннан шыққан заңсыз мигранттар резеңке қайықтармен жүзіп өтпекші болған. Еуропа елдерінің жағалауына жетуге тырысқан 40-қа жуық мигрант жоай қаза тауып, тағы бірнеше ондаған адам зардап шекті, деп хабарлайды Orda.kz.       

1 сәуір күні Италияның жағалау күзеті Лампедуза аралы маңынан адамдарға лық толы резеңке қайықты анықтады. Қайықта 77 адам болған, олардың 19-ы құтқарушылар жеткенге дейін қайтыс болған. Алдын ала мәлімет бойынша, олардың кейбірі суықтан үсіп, біразы қайық түбінде жиналған көмірсутек буларынан уланып көз жұмған. Тағы бес адамның жағдайы өте ауыр болған.

Лампедуза аралы Жерорта теңізі арқылы Солтүстік Африкадан Еуропаға бағыт алған мигранттар үшін негізгі бағыттардың бірі болып қала береді.

Тағы бір резеңке қайық Мугла провинциясы жағалауында апатқа ұшырады.

Түркия жағалау күзетінің мәліметінше, оншақты мигрант мінген қайық патрульдің тоқтау туралы ескертуін елемей, жоғары жылдамдықпен қашуға тырысып нәтижесінде аударылып кеткен. Эгей теңізінен 19 адамның мәйіті табылды, олардың арасында бір бала да бар. Шамамен 20 мигрант құтқарылды.

Мугла провинциясының губернаторы Идрис Акбыйк барлық мигранттардың Ауғанстаннан шыққанын және Грекия аралдарына қарай бет алғанын айтты.

Халықаралық көші-қон ұйымы деректеріне сәйкес, жыл басынан бері Орталық Жерорта теңізінде 624 мигрант қаза тапқан немесе із-түзсіз жоғалған.