«Испания қара жамылды»: Су апатынан 150-ден аса адам қаза болды

Испания су апатынан зардап шекті. Соңғы мәліметтерге қарасақ, құтқарушылар 158 адамның мәйітін тапты, деп хабарлайды Orda.kz агенттігі EFE агенттігіне сілтеме жасап.

Валенсия аймағында табиғи апаттан 155 адам қайтыс болды. Пайпорта қаласында 62 адам қаза тапты, қалада 25 мың тұрғын бар. Испанияның қорғаныс министрі Маргарита Роблес көптеген адамдардың әлі де жоғалғандар тізімінде екенін және іздестіру жұмыстары жалғасып жатқанын атап өтті. Құтқару операциясына 1200-ден астам сарбаз бар.

Испания премьер-министрі Педро Санчес қазіргі басты міндет – зардап шеккендерді одан әрі іздеу екенін айтты. Ол Валенсия мен Кастельон тұрғындарын үйлерінде қалып, құтқарушылардың нұсқауларын орындауға шақырды. Синоптиктер жаңбырдың қайта жауатынын болжап жатыр.

Естеріңізге сала кетейік, 30 қазанға қараған түні Валенсияның бірнеше аймағында бірнеше сағат ішінде шаршы метрге 300 литрден астам жауын-шашын жауды. Чива ауылында шаршы метрге 491 литр жаңбыр жауып, бұл осы аймақтың жылдық жауын-шашын көлеміне тең болды. Лай тасқындары адамдарды, көліктерді, тіпті бүтін үйлерді алып кеткен.

Бұған дейін Қазақстан Президенті Испания королі Фелипе VI-ге көңіл айту жеделхатын жолдаған еді.

«Осы қиын сәтте Қазақстан халқының және өз атымнан сізге және қайтыс болғандардың отбасыларына шын жүректен көңіл айтамын. Зардап шеккендердің тез сауығып кетуін тілеймін», – деп жазылған жеделхатта.

Қазіргі уақытта Испанияда үш күндік ұлттық аза тұту жарияланды. Үкімет ғимараттарында ту төмен түсіріліп, испандықтар қаза тапқандарды бір минут үнсіздікпен еске алды.