Ішкі істер министрлігі шетелдік көліктерді заңдастыру туралы айтты

Полицейлер шетелдік көліктерге рейд ұйымдастыруды жоспарлап отырған жоқ

Биылғы жылдың 1 қыркүйегіне дейін Қазақстанға әкелінген шетелдік көліктердің заңдастырылуы жұртшылықтың көптен күтіп жүрген мәселесі. Науқан келесі жылдың қаңтар айында басталады. Бірақ енді заңдастыру шартына бағынбаған көптеген көлік иелерінің қиналатыны туралы ақпарат бар. Ішкі істер министрлігі қорқатын ештеңе жоқ екенін түсіндіріп өтті.

— Бұзушылықтың жекелеген түрлері үшін жауапкершіліктің күшейтілгенін ескере отырып, ішкі істер органдары шетелдік автокөліктерге арнайы рейд жүргізбейтінін хабарлаймыз. Сондықтан әртүрлі әлеуметтік желілерде көлік иелерін сақтандыру немесе қудалау туралы тараған ақпарат дұрыс емес, көлік иелерінен мемлекеттік органдардың ресми ақпаратына сенулерін сұраймыз, - деп түсіндірді ведомстводан.

Ол полицейлер жол қозғалысын қадағалаған кезде шетелдік көліктерді заңдастыру қажеттігі туралы түсіндіру жұмыстарына көңіл бөлетінін айтты. Бұл ретте, барлық көлік иелерінен Жол қозғалысы ережелерін және жол қауіпсіздігі шараларын сақтауды сұрайды.

Еске салайық, Экологиялық және Салық кодекстеріне түзетулер әзірленген болатын. Азаматтар бастапқы тіркеу үшін шамамен 200-250 мың теңге көлемінде алым ғана төлейтін болады. Заңдастыру кезінде пайдалану төлемі төленбейді. Түзетулер келесі жылдың қаңтарынан бастап күшіне енеді.

Ішкі істер министрлігінің мәліметінше, биылғы жылдың 1 қыркүйегіне дейін елге әкелінген көліктердің тізімдері жасақталып қойған. Кейіннен әкелінген автокөліктер заңдастыруға жатпайды және жалпы негізде тіркеледі.

«Біз автокөліктерді заңдастыру үшін полицияға онлайн өтініш беру мүмкіндігін пысықтап жатырмыз. Полициямен байланыс орталықтары ұйымдастырылады. Тіркелген көліктерге қарапайым ақ нөмірлер беріледі, полиция тәртіпке ешқандай шектеу қоймайды. Еуразиялық экономикалық одақтың тауары болып табылмайтын көліктер кедендік баж салығын төлеуге мәжбүр болады. Осы мақсатта Қаржы министрлігі де азаматтарға қолайлы кедендік декларациялау тетіктерін әзірлеуде» деді министрлік.

Айта кету керек, «қылмыстық» және кедендік рәсімделген көліктер заңдастыруға жатпайды. Ешқандай жас ерекшелігі  немесе экологиялық талаптар болмайды. Басқа талаптар бойынша шешім енді ұлттық және халықаралық заңнаманы ескере отырып қабылданады.