Ішкі істер министрі Тоқаевқа елдегі қылмыс деңгейі туралы есеп берді

Мемлекет басшысы ішкі істер министрі Ержан Сәденовті қабылдады, деп хабарлайды Orda.kz. 

Ержан Сәденов Тоқаевқа елдегі криминогендік жағдай және ішкі істер органдарының «Заң мен тәртіп» қағидатын іске асыру барысы жөнінде ақпарат берді. Ол былтыр қылмыс саны 12,7 мыңға азайғанын айтты. 

Сонымен қатар 2024 жылы полиция іздеуде жүрген 1949 адамды ұстаған.  Министр соңғы 12 айда есірткі таратуға қатысты ақпарат жариялаған 7500-ге жуық интернет-ресурс анықталып, 22 тоннаға жуық есірткі айналымға жіберілмегенін, 64 есірткі зертханасы жойылғанын мәлімдеді. Әрі интернет-алаяқтардың 65 миллион қоңырауы бұғатталған. 

Қасым-Жомарт Тоқаев елдегі құқықтық тәртіп пен қоғамдық қауіпсіздік деңгейін одан әрі арттыру бойынша бірқатар тапсырма берді.