Ішкі істер министрі Тұрғымбаевтың кетуін талап еткен петиция құрылды

Желіде ҚР Ішкі істер министрі Ерлан Тұрғымбаевты отставкаға жіберуді талап ететін петиция жарияланды.

Желі қолданушылары #азаптаудытоқтат хэштегімен наразылық науқанын өткізіп жатыр. Олар ұсталғандарды азаптауды тоқтатып, жазықсыздарды босатуды талап етіп отыр.

Қазір петицияға 1836 адам қол қойған.

Петиция авторы 100 мың адамның қолын жинауға ниетті. Оның айтуынша, қасіретті қаңтарға жол берген ҚР Ішкі істер министрі Ерлан Тұрғымбаев қызметінен кетуі керек.

«06.01.2022 жылы кешкі уақытта «Халық террорист емес» деген үлкен жазумен алаңда тұрған бейбіт халыққа ескертусіз оқ атылды деген шағымдар мен хабарламаларды, дәлелдерді жіті тексеру қажет. Дәлелденген жағдайда бейбіт халыққа оқ атқандар қылмыстық жауапқа тартылуы керек. Сондай-ақ, 07.01.2022, 08.01.2022 жылы өлтірілгендердің қандай жағдайда, кімнің қолынан қаза тапқандарын толық анықтау керек. Ауыр қылмысқа қатысы жоқ митингке қатысқандардың бәрін түгелдей бостандыққа шығару керек» делінген петиция мәтінінде.