Ішкі істер министрі банкир Бақыт Ибрагимнің өліміне қатысты пікір білдірді

Ішкі істер министрлігі банкир Бақыт Ибрагимнің өліміне қатысты сотқа дейінгі тергеуді бастады. Іс «Өзін-өзі өлтіруге итермелеу» бабы бойынша қозғалды.

Бұл туралы мәжіліс кулуарында ішкі істер министрі Ержан Сәденов айтты.

«Бұл факт шынымен Алматыда болды. Осы фактіні негізге ала отырып, біз Қылмыстық кодекстің 105-бабына сәйкес, өзін-өзі өлтіруге итермелеу бойынша қылмыстық іс қозғадық. Қазір тергеу жүріп жатыр. Осы істің аясында көре жатамыз»,  деді Сәденов.

14 наурызда банкир Бақыт Ибрагим өзіне қол жұмсағаны белгілі болды. Ол Qazaq banki-н басқарған, тіпті оның акционері болған. Сондай-ақ отандық БАҚ-та оны экс-премьер-министр Бақытжан Сағынтаевтың күйеу баласы (немесе бұрынғы күйеу баласы) деп те атайды. 

Алайда ашық дереккөздерде ол туралы ақпарат жоқтың қасы, журналистер ол туралы мәліметтерді біртіндеп жинауға мәжбүр.