Ішек ауруы табылған  Сайран  суы ағызылады

Алматының санитарлық эпидемиологтары су сараптамасының қорытындысынан кейін  Сайран су қоймасындағы барлық суды  ағызуды ұйғарды. Оған себеп ондағы  лакто-оң ішек таяқшасының нормадан асып кетуі болып отыр.

 «Ластану көзін анықтау және тиісті шараларды қабылдау үшін аудан әкімдіктерінің (Алмалы, Әуезов), Полиция басқармасының, аудандық санитарлық-эпидемиологиялық бақылау басқармаларының, Төтенше жағдайлар департаментінің мамандары мен экологтардың  жұмыс комиссиясы құрылды. Санитарлық-эпидемиологиялық бақылау басқармасының мәліметінше, бұл кезеңде су қоймасының түбін биологиялық және химиялық тазалаудың қосымша арнайы әдістерін қолдану талап етілмейді» деп нақтылады ТЖД.

Судың толық ағып кетуіне  шамамен 2-3 күн кетеді  деп күтілуде. Сондықтан Төтенше жағдайлар департаменті алматылықтар мен қала қонақтарын алдағы күндері суға түсуден бас тартуды сұрайды. Ластану көзі анықталып, комиссия жұмысы аяқталған соң Сайранға су толтырылатыны нақтылануда.