«Ирина Қайратқызы» тобының мобилографына әлеуметтік желіде көңіл айтылуда

Қайғылы оқиғадан кейін қайтыс болған мобилографтың достары «Ирина Қайратқызы» әлеуметтік желілерінде оның видеосын жариялап, көңіл айта бастады. Олар жігіттің танымал қазақстандық топпен жұмыс істеу мүмкіндігіне қуанғанын да жазды, деп хабарлайды Orda.kz.

Қайтыс болған жігіттің есімі Шахназ Жылқайдаров, ол биыл 21 жасқа толды. Жас жігіт Астана мен Көкшетауда мобилограф болып жұмыс істеп, басқаларға контент жасауды үйреткен. Ол Instagram желісінде белсенді еді. Қайтыс боларынан бірнеше сағат бұрын Шахназ Ирина Қайратқызы тобымен жұмысының қыр-сырымен бөліскен.

Қайғылы жағдайдан кейін марқұмның достары оның видеосын жариялап, көңіл айта бастады. Көпшілік жігіттің өте көңілді, ақкөңіл, өнерлі болғанын жазады.

«Мен сенгім келмейді. Жатқан жері жайлы болсын», «Мен қазір іштегі азаны айтып жеткізе алмаймын». «Сен менің жүрегімде мәңгі қаласың». Қашан да көмектесуге дайын ашық-жарқын Шахназ. Маған қолдау көрсетіп, сенім білдіргеніңіз үшін рахмет», «Сіз біздің жүрегімізде мәңгісіз, менің ең жарқын досым, жаның жәннатта болсын» деп жазады марқұмның достары әлеуметтік желіде. 

Айтпақшы, мобилограф Шахназ Жылқайдаровтың құлаған сәті видеоға түсіп қалған. Кадрда жігіт сахнада құлап қалады. Ди-джей оған көмектесуге тырысады. Қайғылы оқиғаның куәгерлері Шахназ құлап, басын жабдыққа соғып,  есін жоғалтып алған болуы мүмкін деп болжайды. Расталмаған мәліметтерге қарағанда, оның миы ісініп кеткен.

Естеріңізге сала кетейік, қайғылы оқиға Астанада 14 қазанда Конгресс-орталық аумағында болған. Алдын ала мәлімет бойынша, оқиға орнын видеоға түсіріп жатқан жас жігіт есінен танып қалған. Полицейлердің түсіндіруінше, жедел жәрдем келген кезде дәрігерлер оның қайтыс болғанын анықтаған. Оқиғаның мән-жайы анықталуда.