Ірі құрылыс компаниясының бұрынғы экономисі сотталды

Астана қаласының қылмыстық істер жөніндегі ауданаралық соты аса ірі мөлшерде бірнеше рет алаяқтық жасады деп айыпталған экономистке қатысты үкім шығарды.

Бұл туралы Астана қаласының қылмыстық істер жөніндегі ауданаралық соты хабарлады.

«Сотталушы К., ірі құрылыс компаниясында экономист бола отырып, «1С бухгалтерия» базасы арқылы контрагенттер тізіміне жұбайының атына рәсімделген фирманы қосқан. Содан соң ақша қаражатын аудару мақсатында төлем жасау үшін аталған фирмадан бухгалтерияға жарамсыз шоттар берген.   Осылайша, жұмысты орындамай және қызмет көрсетпей, құрылыс компаниясының шотынан сотталушының жұбайының фирмасының шотына 2022 жылдың қаңтар-сәуір айлары аралығында 73,3 млн. теңгеден астам  ақшалай қаражат және 2022 жылдың мамыр-тамыз айлары аралығында 26,8 млн.теңге аударылған» делінген хаттамада.

Құрылыс компаниясына жалпы сомасы 100 млн. теңгеден астам шығын келтірілді. Сотта сотталушы кінәсін мойындамады. Алайда, оның кінәсі жәбірленуші өкілінің, куәгерлердің айғақтарымен, ақша аударымдары туралы мәліметтермен, заттар мен құжаттарды қарау хаттамаларымен, букмекерлік кеңсенің жауаптарымен дәлелденді. 

Прокурор айыпты қолдап, соттан бас бостандығынан айыру түріндегі жаза тағайындауды сұрады. Жаза ҚК-нің 190-бабы 4-бөлігінің санкциясы 5 жылдан 10 жылға дейінгі мерзімге бас бостандығынан айыру түріндегі негізгі жазаны көздейді. Сотталушының жауапкершілігі мен жазасын жеңілдететін мән-жай ретінде оның кәмелетке толмаған балаларының болуы танылды. Сот үкімімен сотталушы К. 6 жылға бас бостандығынан айырылды.