Ірі көмір компаниясының басшылығы Құлыбаев кеткен соң толығымен ауыстырылды

Қарағанды облысындағы Шұбаркөл көмір кенішін игеріп отырған «Шұбаркөл Премиум» акционерлік қоғамының директорлар кеңесі экс-президент Нұрсұлтан Назарбаевтың күйеу баласы Тимур Құлыбаев құрылтайшылар қатарынан кеткеннен кейін толықтай өзгерді, деп хабарлайды Orda.kz.

KASE-те жарияланған құжатқа сәйкес, «Шұбаркөл Премиум» акционерлік қоғамының директорлар кеңесінен оның бұрынғы төрайымы Луиза Ақанова мен қоса 4  басқарушы кеткен. Олардың орнына компанияны басқаруға жаңа директорлар кеңесінің төрағасы Бауыржан Райымбеков келді. Сонымен қатар,тәуелсіз директорлар орнына Нұрлан Мәжен (ШҚО Согринск ТЭЦ-інің директоры болған), Дінмұхамед Мүсірәлиев, Әбілүміт Рахматулаев және Әнет Шыныбаев келді.

 Айта кетейік, бір апта бұрын «Шұбаркөл Премиум» акционерлік қоғамының иелері өзгергені туралы белгілі болды. Тимур Құлыбаев, бұл компанияның 67%-ын Joint Resources фирмасы арқылы иеленіп отырған, өзінің үлесін екі ықпалды кәсіпкерге — Кеңес Рақышев пен Шухрат Ибрагимовқа сатты.

«Шұбаркөл Премиум» -ның1 шілдедегі есептік көрсеткіші бойынша 6,3 миллиард теңге таза шығыны бар. Компанияның жалпы жиынтық активтері — 72,3 миллиард теңге.