Елімізге Ираннан 1,7 млрд теңгелік темекіні заңсыз кіргізбекші болған

Маңғыстау облысында 1,7 млрд теңгеге Ираннан темекі контрабандасы фактісі ауыздықталды.

Бұл туралы Orda.kz хабарлады.

Маңғыстау облысы бойынша экономикалық тергеу департаменті Ираннан темекінің Қазақстан аумағына контрабандасын жүзеге асырған қылмыстық топтың іс-әрекетін тоқтатты.

Тергеу барысында Ақтау қаласының «Теңіз порты» кеден бекеті бастығының қамқорлығымен Ираннан керамикалық плита мен томат пастасы деген желеумен 30 контейнер темекі заңсыз тасымалданғаны анықталды.

– Заңсыз темекі контрабандасына көмектескені үшін ұйымдасқан қылмыстық топ мүшелеріне ақшалай сыйақы ұсынылды. Тәркіленген темекінің кедендік құны 1,7 млрд астам теңгені, кедендік төлемдер мен салықтар - 4,8 млрд теңге болды, - деп хабарлады қаржы мониторинг агенттігінің баспасөз қызметі.

Негізгі ұйымдастырушы мен лауазымды тұлға 10 жылға, заңсыз әрекеттердегі үш сыбайлас 5 жылға сотталды.