Ирандағы жойқын жарылыс ондаған адамның өмірін жалмады: Тоқаев көңіл айтты

Қасым-Жомарт Тоқаев Иран көшбасшысы Масуд Пезешкиан мен оның отандастарына көңіл айту жеделхатын жолдады, деп хабарлайды Orda.kz Ақордаға сілтеме жасай отырып. 

Бендер-Аббас қаласындағы Шахид Раджаи портында отын резервуары мен жанғыш химикаттар қоймасы жарылды. Соңғы мәліметтер бойынша, зардап шеккендер саны 700-ден асты, кем дегенде 14 адам қаза тапты.

Биліктің пікірінше, апат химиялық заттардың дұрыс сақталмауынан болған.

Президент зардап шеккендердің тезірек сауығып, қайғылы оқиға салдарын еңсеруді тіледі.

Еске салсақ, Бендер-Аббас қаласында орналасқан Шахид Раджаи теңіз портының аумағында болған қатты жарылыс нәтижесінде порт құрылыстарының бірі құлады. Сондай-ақ порттағы әкімшілік ғимарат зақымданған.

Белгілі болғандай, отын резервуары мен жанғыш химикаттар қоймасы жарылысынан кемінде бір шақырым қашықтыққа зиян келген.

Зардап шеккендер саны үнемі артып келеді. Оларды жақын маңдағы медициналық орталықтарға жеткізеді. Оқиға орнында құтқарушылар жұмыс істеп жатыр, порттағы барлық жұмыс тоқтатылған.