Ирандағы тәртіпсіздік: ирандық қыздың өлімі соққыдан болған жоқ

Иранның сот медицинасы хиджабты дұрыс кимегені үшін полиция ұстаған қыздың неліктен қайтыс болғанын түсіндіретін есеп шығарды. Оның өлімі елде толқулар тудырды.

Сот-медициналық сараптама ұйымының есебінде Махса Аминидің өлімі басынан немесе денесінің басқа бөліктерінен алған соққылардан болмағаны айтылған.

«Мидың және өкпенің компьютерлік томографиясын зерттеу, денені зерттеу және мәйітті зерттеу, өлгеннен кейінгі зерттеулер нәтижелері көрсеткендей өлім басына немесе дененің басқа да маңызды мүшелеріне соққы нәтижесінде болмаған» делінген IRNA хабарламасында.

Хабарламада қыздың 8 жасында миына ота жасалғаны айтылған. Оқиғаның басты себебі осы жағдай болуы мүмкін.

«13 қыркүйекте Амини кенеттен есін жоғалтып, жерге құлады. Жүрек ырғағы бұзылып, қан қысымы төмендеген. Тиімсіз жүрек-өкпе реанимациясы церебральды гипоксияның дамуына әкелді. Науқас көптеген мүшелердің жетіспеушілігінен қайтыс болды» делінген хабарламада.

Ал, бірнеше аптадан бері оқтын-оқтын көшеге шығып, тәртіпсіздіктер ұйымдастырып жүрген наразылар бұл нұсқаға аса сенбейді. Еске салайық, Махса Амини хиджабты дұрыс кимегені үшін ұсталып, полиция бөлімшесіне жеткізілген болатын. Онда ол есін жоғалтып, бірақ әлі тірі кезінде ауруханаға жеткізілді. Екі күннен кейін қыз қайтыс болды, содан кейін елдегі жүздеген әйелдер оқиғаға қарсылық ретінде орамалдарын жұлып алып, өртеп жіберген болатын.