Ирандағы азаматтық наразылықтар 15 күннен бері жалғасып жатыр

Адамдар қоқыс жәшіктерін өртеп, көшеге тосқауыл тұрғызуда. Наразылықтар хиджабты дұрыс кимегені үшін полицей ұстаған 22 жастағы Махса Амини қайтыс болғаннан кейін басталды.

Ислам Республикасындағы соңғы  екі күн салыстырмалы түрде тыныш өтті, бірақ кеше түнде елдің көптеген қалаларында наразылық шерулері қайта жанданды, бұл жаңа тәртіпсіздіктердің басталуына түрткі болды.

Anadolu агенттігінің хабарлауынша, наразылық акциялары 1 қазан күні Иран астанасы Тегеранда, сондай-ақ Сенандедж, Шехр Корд, Шахиншахр, Эрак, Букан, Бабол, Каредж, Мешхед және Керманшах қалаларында түнге дейін жалғасты. Демонстранттар қоқыс жәшіктерін өртеп, жолға тосқауыл қойып, көшелерде от жағуда.

Бірқатар қалаларда шерушілер мен қауіпсіздік күштері арасында қақтығыс болып, полиция көзден жас ағызатын газ қолданды. Қауіпсіздік күштері сот билігі бұйрығымен наразылық білдірушілерді «қоғамдық қауіпсіздікке қатер төндіргені үшін» тұтқындау мен қамауға алу толқынын бастады. Бұқаралық ақпарат құралдарының хабарлауынша, 2 мыңға жуық адам ұсталды, олардың арасында студенттер, танымал тұлғалар мен журналистер бар.

Иранда 17 қыркүйекте ауқымды наразылықтар басталды. Тәртіпсіздік жоғарыда айтылған қыздың өлімінен кейін басталды. Бұған жауап ретінде Иранның ондаған қаласының тұрғындары көшеге шықты. Мемлекеттік телеарна 24 қыркүйекте наразылық зорлық-зомбылыққа ұласып, кем дегенде 41 адамның, соның ішінде қауіпсіздік күштерінің қызметкерлері де қаза тапқанын хабарлады.