Иран ұзақ қашықтыққа ұшатын қанатты зымырандарын таныстырды

Иран ұзақ қашықтыққа ұшатын қанатты зымырандар жасап шығарды және қазірдің өзінде оны өз  арсеналына қосып үлгерді.

Иранның революциялық гвардиясының жоғары лауазымды қолбасшысы елдің ұзақ қашықтыққа ұшатын зымыран жасап шығарғанын айтты. Reuters агенттігінің хабарлауынша, зымыран кешені Ислам Республикасының арсеналын толықтырып үлгерген.

Аэроғарыш күштерінің басшысы Әмірәлі Хаджизаде: «Біздің 1650 шақырым қашықтыққа ұшатын қанатты зымырандарымыз Иран Ислам Республикасының зымыран арсеналымен толықты» деп мәлімдеді.

Оның айтуынша, Иранға үнемі төніп тұрған қоқан-лоққылар жаңа «Павех» қанатты зымыранын қарқынды дамытуға серпін берді. Сонымен бірге, қолбасшының айтуынша, зымыран ирандық генерал Касем Сүлейманидің өліміне қатысы бар адамдарды жоюға арналған.

Иранның АҚШ-тың қарсылығына қарамастан зымырандық бағдарламасын, әсіресе баллистикалық зымырандарды кеңейткені атап өтілді. Дегенмен, Тегеран бұл бағдарламаның тек қорғаныс және тосқауыл екенін айтады.