Иран азаматтары үшін 14 күнге визасыз кіру режимі енгізіледі

Бұл туралы бүгін Тегеранда өткен кездесуде Қасым-Жомарт Тоқаев пен Ибрагим Раиси келісім жүргізді. Ақорданың хабарлауынша, отырыс шағын құрамда өтті.

— Біз Иран азаматтары үшін 14 күндік мерзімге визасыз режим енгіземіз. Бұл шара түрлі салалардағы ынтымақтастықты одан әрі кеңейтуге, соның ішінде бизнес-қоғамдастық өкілдері арасындағы байланыстарды арттыруға, туристерді көптеп тартуға бағытталған. Бұл артықшылықты ирандық кәсіпкерлер барынша пайдаланып жатыр деп ойлаймын, - деді Қасым-Жомарт Тоқаев.

Қасым-Жомарт Тоқаев Президент Ибрагим Раисиге Иранға ресми сапармен келуге шақырғаны үшін алғыс айтты.

— Ыстық қабылдау мен қонақжайлылық үшін алғысымды білдіргім келеді. Шақыруыңызды үлкен қанағатпен қабылдадым. Президент ретінде мен Иранға бірінші рет келіп отырмын. Бұл сапар маңызды. Бүгінгі келіссөздер елдеріміз арасындағы ынтымақтастықты дамытуға серпін беретініне сенімдімін. Қазақ: «Көрші ақысы – Тәңір ақысы»  дейді. Еліміз әрқашан көршілерімен тату-тәтті өмір сүріп келеді. Иран біздің Каспий аймағындағы ең жақын көршіміз және сенімді серіктесіміз, - деді ол.

Қасым-Жомарт Тоқаев маңызды датаға – екі ел арасындағы дипломатиялық қарым-қатынастың орнағанына 30 жыл толуына жеке тоқталды. Осы уақыт ішінде елдеріміз арасындағы қарым-қатынас нығайып, достық нығая түсті деп есептейді.

— Біздің жан-жақты байланыстарымыз күн сайын қарқынды дамып келеді. Бұл өзара сенімге негізделген саяси диалогтың нәтижесі. Үкіметаралық, парламенттік және іскерлік кеңестер бар. Бар кедергілерге қарамастан, сауда-экономикалық ынтымақтастық айтарлықтай кеңейіп келеді. Биылғы жылдың бірінші жартыжылдығында өзара сауда 50 пайызға жетті. Ендігі мақсат – қарқынын бәсеңдету емес, арттыру. Бұл үшін бізде барлық қажетті әлеует бар. Мен сіздің серіктестікті дамытуға қосқан үлесіңізді жоғары бағалаймын. Мен өз тарапымнан ынтымақтастығымызды ілгерілету үшін бар күш-жігерімді салуға дайынмын, - деді Қазақстан Президенті.

Бүгінгі отырыста Иран азаматтарының Қазақстанға визасыз кіруі туралы шешім қабылданды, ол 14 күнге созылады. Өз кезегінде Президент Ибрагим Раиси Тоқаевқа оның Иран Ислам Республикасына ресми сапармен келуге шақыруын қабыл алғаны үшін алғыс айтты.

— Сізбен алғашқы кездесуіміз Душанбедегі саммит аясында өтті. Сізді Тегеранда қарсы алғаныма өте қуаныштымын. Сіздің Иранға сапарыңыз жаңа серпін беріп, қарым-қатынастарымызға үлкен бетбұрыс жасайтынына сенімдімін, - деді Иран басшысы.