Иордания алапесті жеңген әлемдегі алғашқы ел атанды

Дүниежүзілік денсаулық сақтау ұйымының (ДДCҰ) мәлімдемесінде Иордания алапесті (лепра) жеңе алған әлемдегі алғашқы ел атанды, деп хабарлайды Orda.kz.

Дүниежүзілік денсаулық сақтау ұйымы Иорданияны ауруды алғаш жеңген ел атануымен  құттықтады. 

«ДДCҰ Иорданияны осы керемет жетістігімен құттықтайды. Алапес мыңдаған жылдар бойы адамзатқа кесірін тигізді. Енді біз оның елден елге таралуын тоқтатып, жеке адамдар мен отбасыларды осы ауру құрсауынан құтқарамыз», – деді ДДCҰ бас директоры Тедрос Адханом Гебрейcус.

Хансен ауруы деп те аталатын алапес «Mycobacterium leprae» микобактериясынан туындайды. Ол теріге, нервтерге және шырышты қабаттарға әсер етеді. Егер адам уақтылы емделмесе, ауыр зардабын шегеді. Алапеспен күрестегі жетістіктерге қарамастан, ауру әлі де әлемнің 120-дан астам елінде кездеседі.

Қазақстан Денсаулық сақтау министрлігінің мәліметіне қарасақ, 10 жыл ішінде елімізде үш жағдай болған. Ал аурумен қайта ауырып қалған екі науқас бар. 2024 жылдың басында Қазақстанда 246 науқас және сол науқастармен қарым-қатынаста болған 222 адам бар. Бұл ауруды Қызылорда облысындағы республикалық лепрозорияда емдейді.