Интерпол LRT ісіне қатысты күдіктілердің бірін тапты

Интерпол Астанадағы LRT құрылысындағы жемқорлық бойынша күдіктілердің бірін іздеп тапты, деп хабарлайды Orda.kz.

Бұл туралы Қуандық Бишімбаевтің ісін жүргізген прокурор Айжан Аймағанова өз Instagram парақшасында жариялады. Оған Астана қаласы прокурорының орынбасары Азамат Ермаханов жағдайды баяндапты. 

Азамат Ермахановтың айтуынша, интерпол күдіктілердің біреуі қазіргі таңда Батыс елдерінің бірінде жүргенін мәлімдеген. Алайда құқық қорғау органдары күдіктінің нақты кім екенін айтпады. Ол адамды экстрадициялау бойынша да жұмыстар атқарылып жатыр екен. Күдікті 2023 жылдан бері іздеуде болған. Тергеу барысында оның қылмыстық топқа қатысы бары анықталған.

Еске салайық, осы қылмыстық іс бойынша Astana LRT компаниясының бұрынғы басшысы Талғат Ардан мен елорда әкімінің бұрынғы орынбасары Қанат Сұлтанбековке халықаралық іздеу жарияланған еді. 

Сонымен қатар Астана әкімі Жеңіс Қасымбек үкіметтің кеңейтілген отырысында LRT қыркүйек айында жұмысын бастайтынын айтқан.