«Интернетсіз қалдық»: Түркістан облысында бес ауыл бір айдан бері байланыссыз отыр

Түркістан облысы Бәйдібек ауданында қатты желден байланыс мұнарасы құлап, бес ауыл байланыс пен интернетсіз қалған. Ауыл тұрғындары жарық пен ауыз судың да жыры бітпей қойды деп налиды.

«Ауыз суды есекпен тасимыз»

Интернеті өшкен Жыланды ауылының тұрғыны Мықтыбек Жұмановтың айтуынша, көршілес жатқан Қызыл арық, Амансай, Талап, Түйетас ауылдары да байланыссыз қалған. Тұрғындар туған-туыстың хабарын білмек былай тұрсын, жедел жәрдем қызметі мен төтеншеліктерді шақыра  алмай әлекке түскен.

  — Түркістан облысында бес ауыл бір айдан бері байланыссыз отыр. Қатты жел тұрды да, интернет өшті. Білесіздер, қазір оқудың бәрі интернетке байланған. Мұғалімдер мен оқушыларға обал болды. Күндіз сабақ өтеді. Түнде қырға шығады, ол жерден таппаса ауылдарды аралап сабаққа дайындалады, журнал толтырады. Осылай интернет іздеп ауыл кезіп кетті. Қайда барамыз, кімге айтамыз? Әкімдік құрғақ уәде береді, орындамайды, - дейді ол.

Жыланды ауылындағы жүз елуге тарта отбасында сегіз жүзге жуық адам тұрады. Тұрғындар мал асырап, егін егіп күн көреді. Газ жоқ. Көшелеріне төселген асфальттің өзі ескірген. Интернеттен бөлек тіршілікке ең қажетті деген жарық пен судың жайы да ауыл халқын алаңдатады.

  — Ала жаздай жарық пен судың азабын көрдік. Трансформатор күйіп кетті. Жарық болмаған соң су да тоқтады. Бала күнімізде ауыз суды есекпен таситын едік. Енді осындай дамыған заманда немерелерім де суды есекпен тасып жүр. Бұл сұмдық қой, -  дейді ауыл тұрғыны Мақұлбек Айдарбеков.

Жыланды ауылының тұрғындары жарықтың сөнуіне тек трансформатордың күйіп кетуі емес, электр сымдары тартылған бағаналардың шіріп кетуі де себеп дейді. Олар бағаналардың қойылғанына елу жылдан асқанын айтып, балалар тоққа түсіп қала ма деп алаңдайды. Ауыл ішіндегі бағаналардың көбі қисайған, үп еткен желден электр желісі үзіліп кетеді. Кей бағаналардың түбіне бетон құйылған, кейбірінің жанына қазық қағып, сыммен байлап тастаған.

«Интернет пен байланысты қалпына келтіруге уақыт керек»

Жыланды ауылындағы интернеттің өшуі, жарықтың жиі сөнуі мен ауыз судың жырынан аудан әкімшілігі хабардар.

Боралдай ауылдық округі әкімінің міндетін атқарушы Нұржан Сыздықбаев ауыл тұрғындарының талабымен таныс. Ол электр бағаналарының шірігенін білгенімен, оны ауыстыру құзырында емес  екенін айтады. Бұл электр жарығымен қамтамасыз етіп отырған компанияның міндеті.

 — Электр бағанасы шіріген. Оған шығып жөндеу мүмкін емес. Мамандар шақырып, тексерттік. Компания ауыстырамыз деді. Алмастырады деген үмітпен күтіп отырмыз, -  дейді Сыдықбаев.

Бәйдібек ауданы әкімдігі ақпараттық қауіпсіздік бөлімінің басшысы Сейсенғали Арыстанбаев та  бес ауылда интернет пен байланыс үзілгенін растайды. Оның айтуынша, құлаған мұнараны қалпына келтіру әзірге мүмкін емес. Жаңа байланыс мұнарасы мемлекеттік сатып алу порталы арқылы алынады. Сол үшін интернет пен байланысты қалпына келтіруге уақыт керек.

Авторы: Дилара Иса, Шымкент