Инфекция өршіп барады: Алматыда шектеу шаралары күшейтіледі

Аумақтық Санитарлық-эпидемиологиялық бақылау департаментінің басшысы, Алматы қаласының бас мемлекеттік санитарлық дәрігері Жандарбек Бекшин шілденің 3 аптасында коронавирустық инфекцияның 12 мыңнан астам жағдайы тіркелгенін айтты.

Бұл маусым айының осы кезеңіндегі көрсеткіштерден 4 есе жоғары. Демек, қоғамда COVID-19-дың таралу қарқыны жоғары, сондықтан қатаң шектеу шаралары енгізілуі тиіс.

Бүгінде инфекция жұқтыратын негізгі орындар: базарлар, қоғамдық көліктер, мейрамханалар, кафелер, барлар, адамдар көп жиналатын саябақтар мен жаяу жүргіншілер көшелері. Эпидемиологтардың айтуынша, базарларда дерт жұқтыру 10%-дан 15,9%-ға дейін, сауда нысандарында 31%-дан 39,7%-ға дейін, демалыс саябақтарында және жаяу жүргіншілер орындарында  - 1,2%-дан 5%-ға дейін өскен. Сондықтан Ведомствоаралық комиссияның ұсынысы бойынша коронавирус инфекциясының таралуын болдырмау үшін шектеу шараларын күшейту жоспарлануда. Қаланың бас мемлекеттік санитарлық дәрігерінің қаулысына жақын арада тиісті толықтырулар мен өзгерістер енгізіледі әрі жарияланатын болады.

 Сонымен қатар, карантиндік шаралардың сақталуын бақылау жөніндегі мониторингтік топтардың жұмысы туралы да айтылды.  Бүгінде Алматыда 40 мониторинг тобы жұмыс істейді. Шілде айының басынан бастап 278 көшпелі іс-шаралар өткізілді, 2733 объекті қамтылды, 245 бұзушылық анықталды. Заңды және жеке тұлғаларға 173 хаттама жасалды. Әкімнің орынбасары Ержан Бабақұмаров Ashyq-та жұмыс істейтін нысандар арасында тәртіп бұзушыларды анықтау жұмыстарын күшейтуді және қоғамдық орындарға «қызыл мәртебемен» барғандарды жауапкершілікке тартуды тапсырды.

Мобильді топтар талаптарды бұзушыларға мониторинг жүргізеді: нысанның қызметін (жұмыс режимі) шектейді; отбасылық, мерейтойлық іс-шараларды (банкеттер, үйлену тойлары, мерейтойлар, мерейтойлар) және көптеген адамдар жиналатын басқа да іс-шараларды өткізуге тыйым салады; әлеуметтік қашықтықты, бетперде режимін, келушілер санының шектен аспауын талап етеді.

Қолданыстағы шектеулерді күшейту инфекцияның жаппай тарауының алдын алуға бағытталған, бұл денсаулық сақтау жүйесіне ресурстарды тиімді бөлуге және сапалы медициналық қызмет көрсетуге, төсек орындар мен медицина персоналының тапшылығын болдырмауға мүмкіндік бермек.

Қала тұрғындарына коронавирус инфекциясына қарсы вакцина алу қажет, бұл тұрғындардың денсаулығын қорғайды және жақын адамдарды дерттен сақтайды.

— Қалада эпидемиологиялық ахуал күрт ушықты. COVID-19-дың «Дельта» нұсқасын жұқтыру тренді, «үнді штаммы» – өсе түсуде.Қалада денсаулықты сақтау мен эпидемияның алдын алудың жалғыз жолы – тек вакциналану. Сондай-ақ бәріміз бетперде режимін және әлеуметтік арақашықтықты сақтауға тиіспіз, — деп атап өтті Ержан Бабақұмаров. 

Сондай-ақ екпе салдыру, бетперде режимі мен әлеуметтік арақашықтықты қатаң сақтау эпидемияның өршуі кезінде өте маңызды екені ескертілді.