InDriver жүргізушісі қызды зорлап, жазадан құтылып кеткен

Оралда InDriver такси жүргізушісі танысымен бірге 3-курс студентін зорлап кеткен. Полицейлер қылмыскерлерді куәгер ретінде босатып жіберген.

Бұл туралы Orda.kz Уральская неделя басылымына сілтеме жасап хабарлады.

Зардап шегушінің адвокаты әділдік іздеп, облыстық прокуратура мен БҚО полиция департаментіне шағымданған.

Белгілі болғандай, қайғылы оқиға 7 тамыз орын алған. Жәбірленуші құрбысының үйінен кеш қайтып, такси шақыртқан.

– Көліктің ішіндегі екінші адамды тағы бір жолаушы екен деп ойладым, - дейді қыз.

Бойжеткен арам ойсыз аялдамадан таксиге отырып кеткен. Алайда, біраз уақыттан соң жүргізуші бағытын өзгертіп, есікті бекітіп, қала сыртына шығып кеткен. Көлікті бірден тоқтатып, жолаушыға бірден тап берген.

– Олар мені қарсыласпасын деп, тұншықтырды, - дейді бойжеткен.

Екі күдікті қызды жапан далада зорлаған. Артынша оны «Птицефабрика» ауданындағы бір үйге апарып, арам пиғылдарын жалғастырған.

Таңға жуық екі ер адам бойжеткенді үйіне жеткізіп тастаған. Зардап шегуші бірден полицияға жүгінген. Полиция күдіктілерді телефон нөмірлері бойынша бірден анықтаған. Тергеу кезінде бірден кінәларын мойындаған.

Полиция ҚР Қылмыстық кодексінің 120-бабы бойынша іс қозғаған. Күдіктілер 9-12 жылға сотталуы керек еді. Бірақ тергеуші күдіктілерді «куәгер» ретінде ешқайда кетпеу туралы қолхатпен бостандыққа жіберген.

– Өте ауыр бап бойынша айып тағылып отыр. Сондықтан күдіктілерге неге куәгер мәртебесін беріп, бостандықта қалдырғаны түсініксіз болып тұр, - дейді жәбірленушінің адвокаты Мереке Ғабдуалиев.