InDrive және Яндекс қосымшаларына шектеу енгізілмек

Енді елімізде InDrive және Яндекс такси жүргізушілеріне 50 шақырымнан артық жүруге тыйым салынуы мүмкін.

Бұл туралы Көлік министірі Марат Қарабаев үкіметте өткен брифингте айтты.

Шектеу, әсіресе, екі қала арасында жиі қатынайтын «Альфард» көліктеріне қатысты болады. Мұндай шектеудің басты мақсаты қалалар арасындағы автобустардың бәсекеге қабілеттілігін арттыру. 

«Орташа жылдамдықты орнатуға қатысты енгізгелі жатқан норма автобус қызметтерінің қайта жандануына әсерін тигізеді деп ойлаймын. Қазір азаматтар inDrive немесе жеңіл автокөлікті құп көреді, өйткені жүргізушілер рұқсат етілген жылдамдықты асырып, тезірек жетеді. Орташа жылдамдық болғанда, А нүктесінен В нүктесіне жететін уақыт айырмашылығы соншалықты алшақ болмайды», – деді Қарабаев Үкіметте өткен брифингте. 

Сонымен қатар такси қызметіне Face ID  жүйесі енгізілуі де қарастырылуда. Жүргізушілер қосымшаға кіргенде алдымен Face ID идентификаторынан өтеді, содан кейін қосымшамен жұмыс істеу уақыты сегіз сағаттан аспауы тиіс. Сегіз сағаттық сапары аяқталған соң, «Яндекс Такси» қосымшасына қайта кіре алмайды. Осылайша такси жүргізушілерінің жұмысын қатаң бақылауға алу жоспарлануда.