Индерде кіреберіс жолды су басқанына байланысты тұрғындарды қайықпен тасымалдап жатыр

Жайық өзеніндегі қайық қызметі ауыл тұрғындарының облыс орталығына жетуіне көмектеседі. Тасымалдау 15 мамырдан бастап сағат 9.00-ден 19.30-ға дейін, түскі үзіліс 13.00-ден 14.30-ға дейін болады.

Бұл туралы «Ақ Жайық» хабарлайды.

«Оралдың арғы жағында төрт ауылдық округ пен оған іргелес елді мекендер бар. Атап айтқанда, Көктоғай, Өрлік, Есбол, Елтай ауылдық округтері мен Ынтымақ, Аққала ауылдары»,- деді Индер ауданының әкімі Дарын Шамұратов.

Индербор кентіндегі орталық көпір мен қайық тасымалы арасында да ауылішілік бағыт қарастырылған.

Естеріңізге сала кетейік, Атырау-Орал тас жолының Индербор ауылына кіреберіс жолының жеті шақырымы шайылып, қауіпсіздік мақсатында жол қатынасы уақытша жабылған болатын. Қазір кірме жолды қалыпқа келтіру жұмыстары жүргізілуде.