Импорттық жұмыртқаға тосқауыл: Қазақстан бақылауды күшейтті

Қазақстанда заңсыз жолмен әкелінетін тауық жұмыртқаларына қатысты бақылау шаралары күшейтілді. Бұл шешім Құс өсірушілер одағының өтінішінен кейін қабылданды, деп хабарлайды Orda.kz.

Одақ өкілдерінің айтуынша, соңғы уақытта кейбір сауда орындарында тиісті мемлекеттік бақылаусыз, шетелден заңсыз әкелінген жұмыртқалар ашық саудаға түсіп жатыр. Маусым айында жүргізілген мониторинг нәтижесінде еліміздің бірнеше өңірінде таңбасы жоқ немесе заңсыз әкелінгені анық байқалатын өнімдердің сатылымда жүргені тіркелген.

Құс өсірушілер бұл жағдайдың отандық өндірушілерге әділетсіз бәсекелестік тудыратынын, ал тұтынушылар үшін қауіпсіздік қатерлерін арттыратынын мәлімдеді.

«Мұндай өнімдер заңды жұмыс істеп отырған кәсіпкерлердің құқықтарына нұқсан келтіріп қана қоймай, халықтың денсаулығына да қауіп төндіреді», – деп хабарлады одақ.

Аталған мәлімдемеден кейін сауда және интеграция министрлігі импортқа бақылауды күшейту туралы шешім қабылдағанын растады.

Еске сала кетейік, биылғы 4 сәуірде Ауыл шаруашылығы министрінің бұйрығымен Қазақстан аумағына шетелдік тауық жұмыртқаларын уақытша әкелуге тыйым салынған болатын. Бұл шара ішкі нарықтағы бағаны тұрақтандыру және демпингке жол бермеу мақсатында енгізілген.