Иманғали Тасмағанбетовтің күйеу баласы мұнай өндіру компаниясындағы үлесін сатты

Қазақстандағы ең бай кәсіпкерлердің бірі мұнай өндіретін компаниясын сатты, деп хабарлайды Orda.kz.

Кеңес Рақышевке тиесілі Fincraft Resources өнеркәсіптік холдингі ARK Petroleum  мұнай өндіруші компаниясындағы үлесін сатты. Қазақстан қор биржасы (KASE) сайтында 19 наурызда жарияланған құжатқа сәйкес, 12 наурыздан бастап Fincraft Resources «ARK Petroleum» ЖШС-нің 50% үлесіне иелік етпейді. Холдингтің негізгі активтері қатарында «SAT Nickel» ЖШС, «SAT Petrochemicals» ЖШС және «Ертіс» ферроникель комбинаты қалып отыр.

«ARK Petroleum» ЖШС 2023 жылдың маусымында құрылды – Маңғыстау облысындағы Шалва мұнай-газ кен орнын барлау құқығы үшін өткен сауда-саттықтың алдында.Аукционда жеңіске жеткен компания 112 шаршы шақырым аумақта көмірсутек іздеу құқығына ие болды.

Ал қазіргі иелеріне «Proxymunai» ЖШС (экс-мажіліс депутаты Серік Қонақбаев пен Шолпан Әбдукаримова бақылайды), «Hauling-1» ЖШС (Сабыр Қожахметов), «Центр-Энерго» ЖШС (Рахман Асамбаев – ол компаниядағы үлесін тікелей де иеленеді) жатады. 

Сонымен қатар, 2024 жылғы мәлімет бойынша Сабыр Қожахметов Fincraft Resources компаниясымен тығыз байланысты болған. Ол акционерлік қоғам басқарма төрағасының орынбасары қызметін атқарды, «Ертіс» ферроникель комбинатының бақылау кеңесіне кірді және Battery Metals Technologies Ltd компаниясының атқарушы директоры болды. 

Айта кетейік, Fincraft Group-тың мажоритарлық акционері Кеңес Рақышев Forbes Kazakhstan рейтингісінде 19-орында.Оның байлығы 435 миллион долларға бағаланады.