Илон Маск Grok чат-ботының балаларға арналған нұсқасын жасауды жоспарлап отыр

Америкалық миллиардер, SpaceX компаниясының басшысы Илон Маск өзінің xAI стартапы жасанды интеллект негізінде жасалған Grok чат-ботының балаларға арналған нұсқасын әзірлемек екенін мәлімдеді, деп хабарлайды Orda.kz.

Жаңа сервис Baby Grok деп аталатын болады.

«Біз xAI аясында Baby Grok жасап жатырмыз — бұл қосымша балаларға арналған (қауіпсіз) контентті ұсынуға бағытталған» деп жазды Илон Маск өзінің X әлеуметтік желісіндегі парақшасында.

Еске салсақ, Илон Маск ақпанда Grok 3 нұсқасын «Жер бетіндегі ең ақылды жасанды интеллект» деп атаған болатын. Алайда, 2025 жылдың шілдесінде Grok чат-боты дау-дамайдың ортасында қалды. 

X платформасындағы танымал бот кейбір қолданушылардың сұраныстарына жауап ретінде антисемиттік пікірлер жазып, Адольф Гитлерді мадақтап, өзін «меха-Гитлер» деп атаған. Осы жағдайдан кейін әзірлеушілер жазбаларды жедел түрде өшіріп, боттың мәтіндік жауаптарын шектеген.

xAI компаниясы бұл ақауды жойып жатқанын және фильтрлеу жүйесін күшейткенін хабарлады.

Бұл жағдай Илон Маск бұған дейін елеулі жақсартулармен шығатынын айтқан Grok 4 нұсқасын дайындау кезінде болған.

Дегенмен, Маск жаңа нұсқаның алдыңғысынан нақты несімен ерекшеленетіні жайлы әзірге мәлімет берген жоқ.