ІІМ қызметкерлеріне 150 мың теңгеден сыйақы беріледі

Ішкі істер министрі Ерлан Тұрғымбаев ТЖ кезінде құқықтық тәртіпті қамтамасыз етуге ат салысқан қызметкерлерге 150 мың теңге көлемінде сыйақы берілетінін хабарлады.

«Әлеуметтік-экономикалық жағдайды тұрақтандыру жоспарына сәйкес ІІМ үш іс-шараның негізгі орындаушысы болып табылады. Біріншісі - әскери қызметшілердің жауынгерлік әзірлігі мен жарақтандырылуын арттыру, жауынгерлік рухын қолдау жөнінде шаралар қабылдау. Ең алдымен арнайы бөлімшелердің материалдық-техникалық базасын нығайту жоспарланып жатыр. Жалпы, материалдық-техникалық базаны нығайтуға үкімет резервінен қаражат бөлінді» деп мәлімдеді министр үкімет отырысында.

Тұрғынбаевтың айтуынша, әскери қызметшілердің жауынгерлік әзірлігі мен жарақтандырылуын арттыру, жауынгерлік рухын қолдау жөнінде шаралар қабылдау бойынша стресске төзімділікті арттыру үшін арнайы тренингтер ұйымдастырылады. Тұрақты негізде ынталандыру жүзеге асырылып, қызметкерлердің еңбегі атап өтіледі.

«Мысалы, ТЖ режимі кезінде құқықтық тәртіпті қамтамасыз етуге тартылған қызметкерлерге 150 мың теңге көлемінде сыйақы және курсанттар мен сарбаздарға бағалы сыйлықтар бөлінді» деп қосты Тұрғымбаев.