ІІМ: Пәтерлердің кіреберістеріне 34 мыңға жуық бейнекамера орнатылды

ҚР Ішкі істер министрлігі құқықтық нормаларды реттеу үшін, халықты қауіпсіздікпен қамтамасыз ету үшін «Қазақтелекомның» бейнебақылау жүйесін қолданатындығы туралы Нұрділдә Ораз айтты.

«Сенбі күні Ішкі істер министрі Ерлан Тұрғымбаев пен «Қазақтелеком» АҚ Басқарма Төрағасы Қуанышбек Есекеев Ақмола облысының Ақкөл қаласында қалалық бейнебақылау жүйелерін дамыту және ауқымды деректерді талдауды қолдану саласындағы өзара ынтымақтастық туралы меморандумға қол қойды. Ақкөл қаласы – «Smart City» жобасы іске асырылған Қазақстандағы бірінші қала», - деді ресми өкіл министрлік ұйымдастырған брифингте.

Айта кетсек, «Қауіпсіз қала» тұжырымдамасы аясында қалаларды бейнебақылау жүйелерімен қамтамасыз ету жобасы 2017 жылдан бастап елімізде іске қосылған. Елімізде 350 мың пәтерді қамтитын кіреберістерде 34 мың бейнекамера орнатылған.

«Меморандум аясында Қазақтелекомның бірыңғай бейнебақылау жүйелері ІІМ жүйесіне біріктірілетін болады. Бұл подъездердегі камералардан полицияның жедел басқару орталықтарының мониторларына суреттерді шығаруға және қоғамдық тәртіпті бұзуға жедел назар аударуға мүмкіндік береді. Бүгінде ІІМ өңірлердің жедел басқару орталықтарына қосылған 6 мыңға жуық бейнебақылау камераларын пайдаланады. Олардың көмегімен жыл басынан бері 5,5 мыңнан астам қылмыс ашылып, 408 мыңға жуық әкімшілік құқық бұзушылықтың жолы кесілді», - дейді ресми өкіл.