"Нұр Отан" күдікті ретінде қамауға алынған депутатты партиядан шығарды

Күдікті ретінде қамауға алынған Ақтөбе облыстық мәслихатының депутаты Аркадий Ни "Нұр-Отан" партиясынан шығарылды. Бұл ақпаратты партияның Ақтөбе облыстық филиалы хабарлады. 

"Мәслихат депутаты Аркадий Ни заңға қайшы әрекет жасады деген күдікпен ұсталған соң партиялық бақылау комиссиясы оны партия билетінен айыру мәселесін қарауды ұсынды. Облыстық саяси кеңес бюросының қаулысымен Аркадий Ни партия қатарынан шығарылды" делінген партия филиалының хабарламасында. 

Ақтөбе облысының полиция департаменті Tengrinews.kz сайтына Аркадий Нидің жеке тұлғаға қатысты қылмыс жасағанын айтқан.

"Жеке тұлғаға қарсы қылмыс жасағаны үшін Ақтөбе тұрғынына қатысты (ред. департамент депутаттың аты-жөнін атамаған) сотқа дейінгі тергеу жүріп жатыр. Қазіргі уақытта күдікті Қылмыстық-процестік кодекстің 128-бабына (ұстап алу негіздері) сай,  Ақтөбедегі уақытша ұстау изоляторына қамалды. Қылмыстық-процестік кодекстің 201-бабына (сотқа дейінгі тергеп-тексеру деректерiн жария етуге жол бермеу) сәйкес, өзге ақпаратты жариялай алмаймыз" делінген Tengrinews.kz сайты таратқан полиция департаментінің хабарламасында.

Ниге нақты қандай бап бойынша айып тағылғаны әлі белгісіз.

Кеше әлеуметтік желілерде және бірқатар БАҚ-та Нидің 16 жасқа толмаған азаматпен жыныстық қатынас жасады деген күдікпен ұсталғаны хабарлаған. Алайда ресми орындар бұл ақпаратты әлі растамады, жоққа да шығарған жоқ.