Хоум-Кредит банкінің басшысы Аляскада көз жұмды

Аляска астанасы Анкоридж маңайындағы таулы аумақта тікұшақ апатынан Чехияның ең бай кәсіпкері, PPF Group иесі Перт Келлнер қайтыс болды. Ол 56 жаста еді.

Ақпарат AlaskasNewsSource.com сайтында жарияланды, деп хабарлайды Orda.kz.

Онымен бірге құтқарушылар 52 жастағы Колорадо тұрғыны Грегори Хармстың, Чехиядан келген 50 жастағы Бенджамин Лароштың, Гирдвудтан келген 38 жастағы Шон Макманамидің және Анкориджден келген 33 жастағы ұшқыш Захари Расселдің денелерін тапты.

Жергілік бұқаралық ақпарат құралдарының хабарлауынша, сенбі күні кешке Airbus AS350B3 тікұшағы апатқа ұшырады. Тікұшақ Жергілікті Soloy Helicopters компаниясына тиесілі болған. Бір адам аман қалды. Ол ауыр хәлде Анкоридж ауруханасына жеткізілді.

Петр Келлнер - қаржыгер, PPF Group құрылтайшысы және бас акционері. Еңбек жолын кеңсе тауарларын сатудан бастаған. Forbes мәліметтері бойынша оның байлығы 17,5 миллиард долларға бағаланады.

Қазақстанда компания Home Credit ресейлік құрылымы арқылы «Хоум Кредит энд Финанс Банк» АҚ иеленеді.