Хиджабқа қарсы іш киіммен көшеге шыққан қыз ұсталды

Ирандағы әйелдер қатаң діни ережелерге қарсы батыл қарсылық көрсетіп жатыр. Тегерандағы «Азад» Ислам университетінің студенті хиджаб кию міндетіне қарсылық ретінде оқу ордасы аумағында киімін шешті, деп хабарлайды Orda.kz Reuters-ке сілтеме жасап.

«Еркін Иран» атты Telegram арнасының мәліметіне қарасақ, оған киім ережелерін сақтау талабы жасалған соң қысым көрсетілген.

Әлеуметтік желілерде жарияланған бейнематериалдарда «Басидж» деп аталатын үкіметшіл радикалдық топ өкілдері қызды қатігездікпен ұстағаны, содан кейін оның киімдерін жыртып тастағаны көрсетілген. Оқиғадан соң студент қыз полицияға жеткізіліп, бұл әрекет қоғамда үлкен резонанс тудырып жатыр.

Университеттің қоғаммен байланыс бөлімінің жетекшісі Амир Махджуб:

«Оқиғаға тек университет күзеті араласып, студентті полицияға тапсырды», — деп, күш көрсету әрекеттерін жоққа шығарды. 

 Ал сот органдары әзірге оқиғаға қатысты түсініктеме берген жоқ.

Бұл оқиға Иранда әйелдер құқығы мен өзін еркін ұстау мәселелерін қайта қозғап, көпшілік талқысына айналды.