ХХІ ғасыр Қазақстанның «алтын» ғасырына айналсын – Назарбаев

Қазақстанның тұңғыш президенті Нұрсұлтан Назарбаев халықты республика басшысы Қасым-Жомарт Тоқаевтың бастамалары бойынша бірлесіп жұмыс істеуге шақырды.

– Бұрынғыдай біріксек, бірге боламыз, бәрін жеңеміз. Қазақ біріккенде жеңілмейтін жау болмайтынын тарихтан білесіздер. Президентімізді қолдап, жұмыс істесек біз бірігеміз, болашақта табыстар күтіп тұр, - деді Назарбаев Қазақстан Тәуелсіздігінің 30 жылдығына арналған салтанатты шарада.

Елбасының айтуынша, Тәуелсіздіктің 30 жылдығы Қазақстанның құрылу тарихындағы тағы бір маңызды кезең.

– Бабалар рухы қолдасын, береке-бірлік серік болсын. Жиырма бірінші ғасыр Қазақстанның алтын ғасыры болсын. Біздің бірлігіміз, төзімділігіміз, барлық халықтарға деген өзара құрметіміз және бір-бірімізге деген сүйіспеншілік – ұлы күш, - деп қосты Назарбаев.