Хасан Қасымбаевтың соты басталды

Алматы облысының Талғар аудандық сотында Шерзат Полаттың қазасынан кейін атышулы «Хутор» тобының басшысы деп аталған Хасан Қасымбаевтың соты басталды.

Orda.kz тілшісі соттан тікелей ақпарат таратып отыр.

Айыпталушылар қатарында Мадияр Қалымжанов, Данияр Асқаров, Нұрмұхамет Сұлтанбеков, Руслан Әлиев және Сайлау Ақжанов бар. Істі судья Айнагүл Түкібаева қарап жатыр.

Хасан Қасымбаевқа «адам ұрлау», «ұрып-соғу» және «бопсалау» баптары бойынша айып тағылған.

Оның аты Шерзат ісінен кейін көпшілікке белгілі болды. Сол кезде ел ішінде «Талғарды Хуторлық топ билеп алған» деген әңгіме тарады. Дегенмен, ІІМ ресми мәлімдемесінде мұндай қылмыстық топтың барын жоққа шығарды.

2024 жылғы 4 қазанда «Қамажай» дүкенінде болған жанжал кісі өліміне ұласты. 16 жастағы Шерзат Полат қаза тапты. Бұл оқиға қоғамды дүр сілкіндірді. Осы жағдайдан кейін Талғар аудандық әкімдікте қызмет атқарған Хасан Қасымбаевтың бауыры Аслан Қасымбаев жұмыстан босатылды.

Ресми сот кабинеті дерегіне сүйенсек, Хасан Қасымбаевтың тағы бір бауыры Ержан Қасымбаев бұған дейін «адам өлтіру» бабымен істі болған. Ол кеден қызметкері Медет Жамашевті қасақана өлтірді деп айыпталған.

Orda.kz тілшісіне берген сұхбатында Хасан Қасымбаев: «Менің арым таза, заң бұзған жоқпын», – деген еді.

Алайда 4 қараша күні ол қамауға алынып, оған қатысты тергеу басталды. Тергеу шілде айында аяқталды. 29 шілдеде прокуратура айыптау актісін бекітіп, істі сотқа жіберді.

Сонымен қатар, Хасан Қасымбаевпен суретке түскен подполковник жұрттың сынына ілікті. Кейін подполковник Еркебұлан Қасенұлы: «Хасанмен аңшылықта кездейсоқ жолықтым», – деп түсініктеме берген.

Еске сала кетейік, «Хуторлық топтың басшысы» деп танылған Хасан Қасымбаевтан зардап шеккен Арман Әлімовтің анасы баспасөз мәслихатында оқиғаның мән-жайын баяндаған болатын.