Хасан Қасымбаевтың анасы мен жұбайы Тоқаевқа үндеу жасады

Қонаев қаласында Хасан Қасымбаевтың туыстары Қазақстан президентіне видео үндеу жазып, қылмыстық істің тергеуіне әділдікті талап етті, деп хабарлайды Orda.kz.

Олардың айтуынша, Қасымбаев мүлде кінәсіз және оған тағылған айыптар негізсіз. Туыстары істің объективті әрі бейтарап қаралуын сұрап отыр.

Қасымбаевтың анасы Гүлнәр Нұракенованың айтуынша, баласын жазықсыздан-жазықсыз қаралап отыр екен.

«Құрметті Қасым-Жомарт Тоқаев менің баламның ісін өз қарамағыңызға алып, әділетті шешіп беруіңізді сұраймын. Оның ешқандай кінәсі жоқ. Тергеудің әділетті өткенін талап етемін», — дейді анасы. 

Хасан Қасымбаевтың жұбайы Зүлфия Қасымбаева күйеуінің қандай адам екенін араласатын ортасынан сұрасын деп, оның көпшілік айтып отырғандай жауыз емес екенін жеткізді.

«Хасан туралы не болса соны жазғанша, неге оның қандай адам екенін сұрастырмайды. Біз 15 жылдан астам ерлі-зайыптымыз, 3 бала тәрбиелеп отырмыз. Әлеуметтік желіде Хасанға қатысты жалған ақпарат көп. Оның рас-өтірігін ешкім тексеріп жатқан жоқ», — деді әйелі.