Хасан Қасымбаев ісі: адвокат судьяға төрт рет қарсылық білдірді

Алматыда өтіп жатқан Хасан Қасымбаевқа қатысты сот отырысында қорғаушы тарап судьяның бірқатар шешімін заңға қайшы деп бағалады. Адвокат Айдын Кіргенов судьяға төрт рет қарсылық білдірді, деп хабарлайды Orda.kz.

Адвокат Айдын Кіргеновтің айтуынша, сот жәбірленуші Ермек Тәжіиевтің айыпталушылардың қатысуынсыз жауап беру туралы өтінішін қанағаттандырған.

«Судья Тәжіиевтің сот залында айыпталушылардың қатысуынсыз жауап алу жөніндегі өтінішін жариялады. Біз бұған қарсылық білдірдік, себебі ҚІЖК-нің 100-бабы бұл жағдайда қолданылмайды. Жеке деректері құпия сақталғандықтан, оны айыпталушылардың қатысуынсыз да сұраққа алуға болады. Біз өтінішті қанағаттандырмау жөніндегі өз ұстанымымызды айттық, алайда судья түсініксіз себептермен өтінішті қанағаттандырып, Тәжіиевті біздің қорғауымыздағы адамдардың қатысуынсыз жауап алуға рұқсат берді», – деді Киргенов.

Қылмыстық-процестік кодекстің 100-бабына сәйкес, бұл тәртіп тек ерекше жағдайда қолданылады. Яғни, жәбірленушінің өміріне қауіп төнгенде немесе оның жеке деректерін құпия сақтау қажет болғанда ғана. Ал Тәжіиевке қатысты барлық қауіпсіздік шаралары әлдеқашан қабылданған.

Сонымен қатар, денсаулығына байланысты сотқа келе алмаған үш айыпталушының өтініші қанағаттандырылмаған. Судья олардың қатысуынсыз да процесті жалғастыруға шешім қабылдады.

Киргеновтің айтуынша, қорғаушылар судьяның әрекеттеріне шағым түсірмек. Қазіргі уақытта судья кеңесу бөлмесіне кетті.