Халық сапасыз салынған үйлердің астында «Үлкен мола» болып қалатын шығар! - Айгүл Орынбек

Қазақстандық заңгер Айгүл Орынбек жергілікті тұрғын үйлердің сапасы сын көтермейтінін ашық айтты. Бұл туралы ол Facebook парақшасында жазды.

«Бізде салынып жатқан үйлердің сапасы жер сілкінісі түгілі, қатты жел тұрса шыдамайды!
Жер сілкінсе, бітті…! Халық сапасыз салынған үйлердің астында «Үлкен мола» болып қалатын шығар!» деп жазды ол.

Ол жер сілкінбей-ақ құлап, жарылып жатқан үйлердің қабырғасын күнде көріп жүргенін атап өтті.

«Ең сапалы деп алған үйімнің өзі - сапасыз болып шықты. Жазбаған жерім қалмады, құрылыс компанияларын тексеруге ешкімнің құзыреті жоқ!

Себебі, компаниялардың бәрі дерлік - үлкен-үлкен шенеуніктердің туысқандарына тіркелген!

Мемлекеттен миллиардтап тендерін алып, сапасыз үйлерін салып, «бөлісетіндермен» бөлісіп, ішіп-жеп, дым білдірмей беттері быттыйып, талтаңдап жүр! Арыз жазсаң – «жеңе алмайсың, артында бір «Дәу» тұр, деген әңгімесін алға тартып, прокуратура сыпайы түрде шығарып салады.

Сосын Заңды қадағалап отырғандар осылай деген соң басың салбырап қайтасың!» деп күйінді заңгер.

Айгүл Орынбек Түркиядағы жағдайдан Қазақстан сабақ алу керек екеніне сенімді.

«Үйлердің жанына жабыстырып үй салып, қауіпсіздік шараларын сақтамай, ақшаға құнығуды доғару керек!

Апат деген - айтып келмейді!
Адам өмірі мен қауіпсіздігі - әрқашан бірінші орында тұру керек!
Сапасыз үй салып, құрылыстан жеген ақшаларыңа мешіт салғаннан күнәләрің жойылмайды!

Түрмеден қорықпасаңдар да, Құдайдан қорқыңдар!» деп қорытындылады ол өз жазбасын.