«Халық парламентінің» алғашқы отырысы өтіп жатыр

Бүгін Алматыда «халық парламентінің» алғашқы отырысы өтіп жатыр. Оның құрамында Мұхтар Тайжан, Рысбек Сәрсенбай, Лұқпан Ахмедияров, Нұржан Әлтаев сынды азаматтар бар. 

24 наурызда Алматыда сайлау қорытындысымен  келіспеген қоғам белсенділері жиын өткізіп, билікке талап қойған еді. Журналист Рысбек Сәрсенбайұлы «халық парламенті» құрылғанын жариялап, жұмыс тобын құрды.

Жиында сөз алған журналист, белсенді Инга Иманбай саяси тұтқындарға араша сұрады.  

«Халық парламентінің» мүшесі Рысбек Сәрсенбай сайлауды мектептен тыс жерде өткізуді ұсынды. Сондай-ақ Назарбаев пен оның әулетінің жымқырған мүлкін мемлекет меншігіне қайтару керек екенін басты талап ретінде атап өтті.

Сонымен қатар Рысбек Сәрсенбай Қазақстанның «пайдасыз» одақтар – ҰҚШҰ мен ЕАЭО-дан шығу қажеттігін мәлімдеді.

Оразалы Ержанов президенттік басқарудан парламенттік басқару түріне көшуді көздейтін Конституцияға өзгертулер енгізу бойынша сәуірдің аяғында немесе мамырдың басында референдум өткізуді ұсынды. Сондай-ақ Мәжілістегі мандаттарды 300 адамға дейін ұлғайтып, оның жартысы бір мандатты округтерден сайланатын болсын, деді.

«Халық парламенті» отырысы «Тянь-Шань» қонақүйінде өтуі керек еді. Бірақ қонақүй әкімшілігі шараға бір-екі күн қалғанда ұйымдастырушыларға орын беруден бас тартты. Соның салдарынан ұйымдастырушылар жиын орнын шұғыл түрде өзгертуге мәжбүр болды.