Халық Банк өртте қаза тапқандардың отбасына көмек береді

«Халық Банк» Абай облысындағы төтенше жағдай кезінде қаза тапқандардың  әрқайсысына 3 миллион теңгеден бөліп, қарызы барларды есептен шығаруға уәде берді.

«Халық банк» Абай ауданындағы өртте қаза тапқан орманшылардың отбасыларына үш миллион теңге және бар несиелерін есептен шығаруға уәде беріп отыр.

«Халық банкі өрт кезінде қаза тапқан орман шаруашылығы қызметкерлерінің отбасыларына материалдық көмек жібереді. Сонымен қатар, олардың және олардың отбасы мүшелерінің Халық банкінде бар несиелерін есептен шығарады. Банк басшылығы мен қызметкерлері қызметтік міндеттерін орындау кезінде қаза тапқандардың отбасыларына қайғыларына ортақтасып, көңіл айтады» делінген банктің баспасөз қызметі таратқан хабарламада.

Табиғи өрттен 14 орманшы қаза тапты. Осы сәттерде ерінен, әкесінен, баласынан айырылған отбасылар Қасым-Жомарт Тоқаевпен кездесуді күтуде. Ол қазірдің өзінде облысқа табан тіреді. Ақорда Мемлекет басшысы өртті сөндіру және оның зардаптарын жою жұмыстарының қалай жүріп жатқанын анықтайтынын атап өтті. Мемлекет басшысы жедел штаб отырысын өткізіп, қаза болған орман шаруашылығы қызметкерлерінің туыстарымен кездеседі.